السلام عليكم
كيفكم شخباركم
اممممم هذي التدوينه حبيت اني اقرقر عليكم شوي
و المفترض تكون اول تدوينه بحيث تعرفوني اكثر .. بس يلا مشوها ههههههه
احيانا تجيني اسئلة ..
مثلا انا وين تعلمت ازياء و متى بدات و وش سالفتي بالضبط هههههه
اول شيء اسمي مناهل عمري 18 سنه
باذن الله يوم 21 يناير اصير 19
سنه ثانية جامعة تخصص لغة انجليزية
عندي ميول للفاشن من و انا صغيرة
و احب الرسم من و انا صغييرة
كنت احب اجمع صور فساتين و ادور بين المصممين و العروض
و كنت ارسم تصاميمي الخاصة و اجمها سوا بملف .
و اتذكر زييين كنت اطلع ملابسي
و اخذ ورقة و قلم رصاص و ارسم الموديلات اللي عندي !
متى حسيت اني ابي اطلع موهبتي للناس .. لما جا الانستقرام و انتشر
قبل 3 سنوات تقريبا جتني فكرة اني ليش م انزل تصاميمي فيها !
قلت لامي ابي اسوي حساب و كذا .. وقتها كنت ادرس ثانوي !
ف امي خافت على دراستي و قالت لي ركزي على دراستك افضل
من الوحيد اللي شجعني على الفكرة ؟ هي رنا الاحمدي
هي صاحبة المعهد اللي تكلمت لكم عنها بتدويناتي السابقة
الله يسعدها هذي الانسانة قد ايش تحب تساعد و تشجع و جدا احب طموحها
ف شجعتني ع الفكرة مررة .. ف فتحت الاكاونت اللي هو manaheldesign
و بدات انزل فيها تصاميمي .. و ما كانت تقصر رنا
كانت توجهني و تنصحني برسماتي و شغلي و كل شيء .
بعد فترة طويييلة ..
شفت انستقرام الجميلة قورجس هذا حسابها انستقرام IGORGEOUSTA
و برضو عندها مدونة هنا
جد جد انصحكم تتابعونها انسانة جميلة و ملهمة جدا !
ف كانت تتكلم عن الانستقرام كيف ان بعد فترة الناس راح تتركه و تتجه لبرامج ثانية
فلا يكون انتهائك بانتهاء الانستقرام
و تكلمت عن المدونة و التدوين كيف تحفظ شغلك بحيث يكون مرجع حلو
و من هنا بدات براسي فكرة اني افتح المدونة هذي !
و برضو استشرت رنا بهذي الفكرة .. و شجعتني عليها جدا !
ف فتحت المدونة .. و بعدها بدأت الافكار تجيني
جدا سعيدة اني فتحت المدونة .. و متفائلة فيها كثثيييييير
فتحت المدونة لاهداف براسي
و لأحلااام كبيرة اسعى اني احققها
و برضو عشان انتو بعد تستفيدوون ! لاني اعرف فيه بنات بسني او اصغر
ميولهم الازياء و التصميم
و لان المراجع العربية لتصميم الازياء للاسف تكاد لا تذكر ! مقارنة بالمراجع الاجنبية
فان شاء الله انكم تستفيدون مني .. صحيح انا لسة ببداية الطريق
و لسة مبتدأة بالازياء و الرسم و ....
لكني ابحث كثير و اجتهد و اقرأ عندي من المعلومات اللي ممكن تفيدككم
كل شيء تعلمته بالازياء و الرسم من نفسي و اجتهاد ذاتي
وما انكر ان الدورات اللي اخذتها اونلاين ساعدتني كثير
ف كل ما تعلمت شيء او جربت شيء اقول لكم عنها عشان افيدكم زي م استفدت
.....
مؤمنة جدا بان الاحلام خلقت لتتحقق
و مؤمنة ان كل انسان يقدر يكون الشيء اللي يبيه
بالاصرار و الارادة م فيه شيء مستحيل
بحياتك حلم .. اسعي له
.....
و بسسسس
ان شاء الله تكون عجبتكم التدوينة و الكلام هذا كله ههههههه
القاكم بتدوينه اخرى .
0 comments:
Post a Comment