سلسلة : تعلمي فن رسم الازياء مع مناهل , ايش رسم الازياء و اهميته ؟ و كيف تتعلمين الرسم من الصفر ! : Step By Step

السلام عليكم 

كيفكم يا جميلات مصممات المستقبل 

و كما هو بالعنوان 

باذن الله راح ابدا سلسلة تعلميمية لرسم الازياء و اخيييرا

ليش ؟

كثير منكم يطلبوني انزل دروس او نصايح تساعدكم برسم الازياء

و لاني ابي افيدكم 

قررت ابدأ هذي السلسلة 

اشاركم معكم معلوماتي و تجاربي و مهاراتي بالرسم 

باذن الله راح تكون سلسلة طووويلة جدا 

و اتكلم فيها معكم كل شيء تبونه 

طرق رسم الجسم مثلا ! الوجة , الشعر و....

و طرق تلوين البشرة و الشعر و توضيح الخامات و غيرها الكثييييير

اي شيء تبوني اتكلم عنه قولو لي !

هنا او بالانستقرام او حتى بالسناب

و باذن الله البي لكم قد ما اقدر 

طرق الرسم كثيير , و التكنيكات و الستايلات للرسم متعددة 
و كل واحد له طريقة مختلفة و خاصة فيه 
ما نقدر نقول ان هذي الطريقة صح و هذي غلط
الرسم فن ! و الفن و الابداع ماله حدود
بعض الرسامين يحبون الرسم الواقعي ! و البعض يحب الغير واقعي
البعض يحب الالوان المائية بينما البعض يفضل الماركر مثلا !
البعض يحب اليدوي , و البعض ما يعتمد الا على الرسم بالفوتوشوب 

كل واحد فينا يعتمد الطريقة اللي يفضلها و يرتاح عليها 

و انا بحاول قد ما اقدر اعطيكم اساسيات , و طرقي الخاصة برسم و تلوين بعض الاشياء

تقدرون تقتبسون مني و تستفيدون باذن الله 

و اول تدوينة للسلسلة لهذا اليوم راح تكون مجرد مقدمة 

راح اتكلم معكم عن  رسم الازياء , ايش رسم الازياء ؟ و انواعه ؟

رسم الازياء فن ! من فنون الرسم 

رسم الازياء مرتبط بتصميم الازياء 

و لكن رسم الازياء بحد ذاته يعتبر فن ّ او تخصص 

مصمم الازياء Fashion designer 

اما رسام الازياء Fashion illustrator

ممكن تتساءلون , ايش الفايدة من تخصص رسم الازياء كـ رسم فقط !؟

احيانا يكون للشخص ميول للرسم فقط ! و تحديدا رسم الازياء ف ما يدخل مجال تصميم الازياء
انه يصمم و ينفذ و يبيع

كثير من مصممين الازياء و حتى مصممين عالميين يستعينون برسامين ازياء

لرسم تصاميمهم , ممكن المصمم ما يكون يعرف يرسم و ممكن اوفر لوقت وجهد المصمم

و ايضا كثييير من شركات الملابس و ماركات الملابس يوظفون عندهم Fashion illustrators

و يحتاجونهم لرسم الموديلات للخياطين و غيرها .

من ناحية رسم الازياء لمجال تصميم الازياء :

سؤال يجيني كثييييير بعده صيغ لكن المعنى واحد

و هو : 
- انا احب تصميم الازياء بس ما اعرف ارسم ؟

- ضروري اكون اعرف ارسم عشان اكون مصممة ازياء ؟

- لازم كل مصمم ازياء يعرف يرسم ؟

جوابي هو :

رسم الازياء بنظري مهم جدا جدا جدا لكل مصمم ازياء 

فيه بعض المصممين و حتى مصممين ازياء عالميين ما يعرفون يرسمون ! 

و يوظفون رسامين يرسمون ازياءهم 

لكن اعتقد راح يكون متعب و لو ما تعرفين الخياطة راح يكون متعب اكثر و اكثر

ايش الفايدة من اني اعرف ارسم ازياء ؟

اولا : وقت ما تكون فيه فكرة موديل براسك , تحتاجين جدا انك تطلعينها 

كيف ؟ على الورق عن طريق الرسم 

الافكار اذا قعدت براسك " تطيير "

ف تحتاجين تمسكينها و تثبتينها و تحفظينها عندك

ثانيا : وقت م تطلعين افكارك على الورقة , تقدرين تطلعين بعدها افكاااار كثير عن طريق العصف الذهني

فكرة تجر فكرة تجر فكرة و ككلها عن طريق الرسم 

ثالثا : وقت ما تبين تنفذين الفكرة اللي عندك ف لازم توصلين الفكرة مضبووط للخياطة 

كيف ؟

عن طريق الرسم و توضيح كل التفاصيل 

رابعا : الرسم يساعدك انك تتخيلين المنتج النهائي , لما ترسمين الموديل و تلونينه و توضحين كل التفاصيل و الخامات 

ف انك تقدرين تتصورين الموديل كيف راح يطلع بعد التنفيذ

عشان مو بعد م تخلص الخياطة تنصدمين بالشكل النهائي , و كان بخيالك شيء ثاني .

اعتقد هذي اسباب كافية انك تبدأين و تتعلمين الرسم 

تقولين ما اعرف ارسم ؟ او انا ما عندي موهبة رسم ربي ما اعطاني اياها .

اقول لك .. الرسم " هي مهارة و ليست موهبة " , حتى لو كنتي صفر بالرسم ما تعرفين حتى تمسكين القلم

ف اقول لك و اطمنك انك تقدرين تتعلمين الرسم .. و توصلين للاحترافية بعد 

السؤال المهم : كيف اتعلم الرسم ؟

كلمة السر هي : "التدريب " 

التدريب ثم التدريب ثم التدريب .. تدربي اكثر تتطور مهاراتك اكثر

تدربي اكثر يصير الرسم سهل عليك اكثر و اكثر 

تدربي اكثر تصيرين تعرفين تحطين فكرتك بالورقة بالصورة الصحيحية 

لا تيأسين 

محد ولد و هو بيرفكت بالرسم 

كل الرسامين المعروفين ارجعي لبداياتهم و تعرفين !

نصيحة :

خصصي لك من ساعة الى 3 ساعات باليوم فقط للرسم 

و استغليها بالتعلم على الرسم و تعلم كل ما هو جديد 

و استغليها تتطوري اكثر و اكثر و اكثر 

ابدأي برسم المانيكان ثم الملابس و الشعر و الوجة و ........

خذيها بالتدرييييج

بعد شهر راح تشوفين نفسك قطعتي مسافة ! و تحسين بشعور جمييل بالانجاز

و راح تتحمسين تتطورين اكثر و تتعلمين اكثر و تستمرين اكثر لشهور وحتى سنوات قدام

تبين شيء , اسعي له و راح تلاقين نتايج تعجبك بإذن الله 

برضو تقدرين تتعلمين الرسم عن طريق الانترنت باليوتيوب و المواقع 
الانترنت مليياااااااااان بحر بحر
تقدرين تتعلمين منه .

هنا اعطيكم بعض المواقع و قنوات اليوتيوب اللي احبها و ممكن تستفيدون منها 

قناة Zyra Bañez

هنا

اكثر قناة مفيدة و تنزل فيديوهات باستمرار تقريبا 
رسمها و تقنياتها بالتلوين عجيييبة
و طرقها بالتظليل و توضيح الخامات جميلة جدا .

قناة FSketcher

هنا

القناة هذي مرة احبها 
تعتمد على الماركرز بتلوينها 
لو تحبين الماركرز راح تعجبك طرقها و تكنيكاتها بالتلوين 





اما القنوات العربية :

قناة TH. DESIGN

هنا

قناة مفيدة وحلوة دروسها و متنوعة
و رسمها جميل جدا جدا 

قناة Zainab Murad Consultant

هنا

قناتها حلوة و مفيدة 
و مو بس عن الرسم 
ايضا لها فيديوهات عن الازياء بشكل عام 



موقع I Draw Fashion

هنا

موقع تعليمي للرسم 
عن طريق الصور 
حلو و بتستفيدون 



"  كل ما اكتشفت موقع جديد و حسيته يستاهل راح اضيفه لكم هنا  "

و بمواقع التواصل بعد راح تلاقون معلومات كثير 
انستقرام و ايضا البنترست و التمبلر 

و ان شاء الله تكونون معي بهذي السلسلة , و نتعلم سوا 

و تتعلمون مني , لاني جد جد حابه من كل قلبي اني افيدكم 
،

و لهنا نصل الى نهاية البوست 

و لا تنسون تقولون لي وش حابين تتعلمون و انزل لكم عنه ؟! 

دمتم برعاية الله 

7